Pengingat ka Apo (Engol @ Wie ak Batat)

Saritu, 14 hari bulan lima 2012, nanda ka 3 taun Apo, Engol ak Batat @ Wie  udah nadai.  
Apo mati kena ka 14 hari bulan lima 2009 pukul 6.45 pagi ba spital besai Kuching, laban penyakit rusak tungkul segayuh (buah pinggang) ti ngujung ka iya bisi pneumonia (paru-paru kena jangkitan) enggau septicimea (darah kamah) ti ngujung ka nyawa tudah Apo..


Apo deka seruran dikingat ka belama iya.  Nuan semampai dalam ati aku belama, laban nuan ti apai ti udah nupi serta ngemesai ka aku ari aku mit sampai ka aku besai, udah ngengula ka aku, datai ka aku ulih kerja serta nupi diri.  

Sepanjai pengidup Apo, iya sigi orang ti siru serta sinu ka orang.  Enti bisi orang tusah, tauka bisi rabat di menua, nadai-nadai duit tudah, nyau meh iya kin ngusung, sigi berat ka pengawa orang ti tusah. Tu teladan ti udah di pandang ka apo ti manah.  Jako ajar apo, "anang enda berat ka kaban  belayan kitai, laban nya meh penatai kitai."

Apo, Tiga taun tu udah nadai nuan agi begulai enggau kami, tang nuan semampai di ati selalu dikingat ka belama. Indai semampai laboh ai mata leboh nyebut nama nuan; kami menyadi sigi semampai sinu serta lelengau ka nuan Apo.  Diatu maia aku kerja ba sepital meda orang tuai baka nuan sakit , teringat aku ka nuan suba ti bebendar deka berubat, bebendar deka gerai. Sinu ati ngenang nuan ti nyau ka mutah setiap kali makai ubat ti nyau bulih segenggam, laban ti deka gerai ko jako, tang mati ga tuju nuan pengujung iya Apo....

Nuan deka selalu di ati belama apo ti di sayau...