Pengalaman ngandong serta ngada ka anak ngagai dunya tu sigi siti pekara ti‘unique’ ti semina ungkup orang indu aja. Enda semua indu ulih beranak pia mega enda semua indu deka beranak. Taja pia, bala indu ti udah kala ngasai ngandong enggau ngada ka anak nemu bakani asai mansut ka anak mensia ngagai dunya tu. Tiap-tiap iko indu bisi pengalaman diri empu ti tetap dikingat ka sida belama iya. Tu meh siti ari pekara alam semula jadi ti nyadi dalam pengidup indu ti pemadu besai reti ba iya.
Ngada ka anak ulih ngubah status/pangkat indu nyadi indai, serta mega ulih ngelengkap ka pengidup siko-siko indu. Iya siti pengalaman ajih ti nyadi ba tubuh orang indu ti tau mai pengandal ti tinggi ngagai orang indu.
Tu cerita aku leboh keterubah iya ngandung serta ngada ka anak serta keterubah iya dalam pengidup aku bulih gelar indai. Keterubah iya aku nemu diri empu betubuh bisi ke, enda aku nemu bakani ka madah ka asai ati aku maianya. Ka aku madah ka diri gaga, enda ga aku gaga endar. Ka aku madah ka diri takut, enda ga aku takut. Asai ati aku maianya ulih dikumbai irau. Engka irau laban ngasai ka diri agi biak endar maianya. Tiga bulan keterubah nadai tanda nama-nama. Tang leboh udah manggai ke empat bulan, baru aku ngasai ka diri empu udah berubah. Berubah dalam semua pekara. Semua utai ti bisi bau baka sida minyak bok, shampoo, sabun, minyak wangi, minyak motor, semua bau sidanya endang enda tau sekali-kali mansa idung. Enti mansa, sigi endang lalu engkual deka mutah serta ngelu pala. Merinsa asai sepi aku idup bakanya laban kerja ka deka engkual belama deka mutah. Maioh utai ka berubah ba aku di sepi aku. Utai ka dikerindu pakai aku nyadi enda rindu agi aku makai. Minyak wangi ka manah endar bau, nyadi nyau ngasoh aku ngelu pala deka mutah. Bau minyak bok laki 'Bylcream' ka endang dikena tudah tuai sari-sari tau ngasoh aku ngelu pala serta engkual ka mutah. Utai dempa pan baka nya, maioh endar utai ka deka diempa aku sebedaunya nyau tau lain asai ngasoh aku engkual. Tang, bisi sekeda utai ka enda kala dikerindu ka ngelamanya tau nyadi dikerindu. Baka buah empelam puda, sebedau betubuh bisi enggai aku enggau orang makai sambal emplelam puda. Maianya, nyera deka makai buah empelam puda. Maianya ukai musim buah empelam, tang tetenguk bendar deka makai buah empelam puda. Nyau di ambi mimpi makai buah empelam. Pedis ati meda orang, mudah deka nyabak sinu ati laban gila laban ti nyera ka empelam puda. Tudah laki nyau enda nemu agi. Kasih meda tudah laban enda ulih ngena minyak bok. Tiap kali tudah ngunsut minyak ba pala endang enggai sekali-kali ngimbai tudah tuai. Ni enda kasih deh? Ahssaapai!.....Merinsa pengidup enti bakanya belama. Tubuh nyau aku kurus sekurus maianya laban enggai makai. Nyau kelama, udah masuk ke enam-tujuh bulan nyau nyamai agi asai. Maia manggai kelapan bulan, datai ga penusah sebengkah agi, iya nya kembai kaki. Untut kaki enda nemu agi! Kasut ti manah endang enda ulih masuk agi ba kaki. Tinduk malam pan pedis, perut nyau majak besai, tambah ga kaki ti untut besai, Enti bejalai ke pasar ngena selipar jipon saiz 9. Tu meh maia aku ngasai ka diri jai endar gamal laban idung enggau mua sama bela kembai. Lama endar asai nganti diri deka beranak. Leboh udah manggai bulan kesembilan, dia ati mula irau. Irau ka diri empu ka deka beranak. 'Bakani meh aku tu beranak?; Nemu enda aku neran ka anak aku?; Kati enti anak aku menawa?, Kati enti aku empu jai nasib lalu mati maia beranak?'
Kena pagi 13 haribulan January 1989, iya nya hari aku bisi appointment ba klinik Ibu dan Kanak-kanak ba Sri Aman, ba terminal bas Sri Aman ka diatu, dia kliniknya suba. Betunga enggau spital. Kadiri aku ti nganjung diri ngagai klinik maianya. Laki ba kuching laban kerja. Udah bekau ka diperesa lutor, dia aku pan di tan laban kesatu, kaki jari enggau mua aku kembai; kedua, darah aku tinggi. Kati enda tinggi deh, pelaba aku laban aku tekelalu maioh pengirau ti nyarut ka runding aku.
Lemainya, apai enggau indai aku bisi ngabas aku ka sepital pulai kira-kira pukul 8.30 malam. "Pulai kami duai, mang, pelaba ka bedau nuan beranak malam tu, " pia ko apai. Udah seduai iya ka mulai ka diri, dia aku nyepi perut aku bisi muat mimit. Bisi dua minit bakanya iya pedis, udahnya ngetu. Enda lama udahnya muat baru, sekali tu lama agi, bisi lima minit bakanya pedis. Ngetu baru enda lama. "Ka beranak aku tu," ko aku bejako dalam ati. "Lagi meh enti muat baru aku madah ngagai nurse."
Muat sekali da agi, lama endar serta enggau pedis ama. Dia aku lalu madah ngagai nurse. Nurse pan lalu meresa aku. "Au, ka beranak nuan tu, Rose." ko iya. Sida pan nyurung ka aku ari wad ngagai 'Labor Room' bilik endor orang beranak. Jam maianya udah pukul 10 lalu, nyau ka semak pukul 11. Muat balat endar perut aku leboh baru datai ba bilik beranak. Nyau engkutung tubuh nat ka pemedis iya. Lama endar asai pedis asai ka enda nemu badu. Ngetu enda lama. Mata ka tinduk . leboh maia iya muat baru, 'Akai indai, tu meh asai ka beranak' ko aku bejako dalam hati. 'Tulong meh aku Tuhan. Saup meh aku nunga pemedis tu, " ko sampi aku leboh maia perut aku muat balat enda badu. 'Lapan centimeter' ko nurse dinga aku. Dia datai dua iko da agi nurse ngimbai endor aku. 'Sedia nuan, Rose'Enti muat balat teran lagi, ko siko ari ti baru datainya bejako. Aku ngasai ka diri lembut endar tulang. Di tuchuk nurse aku ba pah. Perut aku sigi endang enda ngetu pedis. Lama udah pedis sepi aku. Enda nemu ni ti muat balat ni ti enda balat. Mata aku lembut endar ka tinduk. 'ROSE, TERAN KA ANAK NUAN DIATU!' ko siko nurse merak. Aku semina muka mata enda lama, lalu ka lelap baru. Engka udah kelalu lama pedis, chelap meh bisi dia. 'ROSE! ROSE! DANI NUAN!' ko nurse siko baru. Nyamai endar tinduk enti udah asainya sepi aku. Tang bala nurse nyau rauh-rauh ngasoh aku dati, nempik kuyu aku ngasoh aku beteran. Aku nguji ngumpul semua tenaga ngering diri. Sepi aku kak muat meh perut aku balat endar aku lalu nguji neran. TERAN! ko sida tiga nganu aku. Bedau ga pansut. Muat baru, 'TERAN!' Teran endar ka, Rose' ko siko ka nyambut anak. Dia aku teran penapat iya ulih aku. Dia aku ngasai ka utai petang dipeda aku. 'Manah, Rose! Udah pansut pala baby nuan." ko nurse. "Sekali da agi." Muat baru, dia aku lalu neran pengambis pengering aku. Ngelincir asai utai keluar. Jam maianya 11.58 malam. Sempat mata aku meda jam ba dinding ka endang diengkah nunga endor beranak. "Udah? Ni 'baby' aku? Bakani gamal iya? Indu tauka lelaki?" ko runding aku din. "Lelaki anak nuan, Rose," ko siko nurse ti ngangkat ka babynya bejako madah ngagai aku. Tang aku enda tepansut ka jako ngagai nurse. Peda aku nurse nungging ka baby. Keruk iya mulut, engkah iya tube ba nyawa iya kena nyedut ai kamah ka bisi ba mulut baby, enda lama udahnya baru baru bisi ninga baby nya nyabak kele-kele. "Oooo idup meh anak aku' ko aku bejako dalam hati.
Siko nurse lalu ngintu aku. Ngeluarka temuni. Udahnya nyait abi. Nadai asai pedis sepi aku maianya. Engka bisi diberi sida nurse pemenat. Enda berasai aku dijait iya laban aku nyau rindang berati ka siko nurse ti ngintu baby. Udah siap aku dijait, diberesi serta di gari, aku pan lalu disurung pulai ngagai wad, lalu diasoh tindok ba wad. "Anak nuan engkah kami ba 'nursery' malam tu laban lutor ka 'observe' iya." pia ko siko nurse madah. Pelaba aku anak akunya nyau ka lemas laban aku ka nyau lembut tulang deka tindok maia aku ka patut beteran tadi. Sukur meh aku ulih ngering diri. Enti enda ni enda lemas anak aku," ko runding dalam hati.
Malamnya, nadai meh 'baby' dibai ngagai wad baka orang maioh laban lutor deka meda bakani gaya iya semalam nya. Maianya jam udah lepas 1.30 pagi.
Datai aku ba wad aku pan lalu tinduk. Pukul 7 pagi aku tedani ninga bala nurse baru udah sampal datai. Lapar endar sepi aku. "Ni indai aku bedau datai ngabas aku?' ko aku bejako kadiri. Laki aku enda nemu aku beranak, Agi ba Kuching, kerja. Leboh orang meri makai, makai bebendar aku laban kelalu lapar. Pukul 9 pagi, ibu, bini apai biak menyadi indai aku bisi datai ngabas bala sida ka bisi mega beranak. Dia iya tepeda ka aku. Pulai iya arinya iya lalu madah ngagai sida indai aku udah beranak. Maia nya suba ni bisi utai ti dikumbai 'handphone'. Talipon pan tusah ka ngena. Ka betalipon ngagai HQ endor laki kerja, laki pan benong ba kampong. Nadai orang diasoh madah. Bepesan ba orang, nya meh aja cara maia nya suba. Ba tusah.
"Ni anak aku tu neh? Nama lama endar sida enda nganjung iya ngagai aku?" ko aku bejako dalam hati. Aku nyau irau laban semua orang ka beranak dudi ari aku udah bisi merap baby sida. Pukul 10.30 pagi baru siko nurse nyurung ka 'baby' aku. Gaga endar ati aku. Keterubah aku meda ,megai serta merap iya, enda berasai ai mata aku laboh. Gaga, pemadu iya gaga ati aku. Sigat endar baby aku. Iya ga burak, kuyu iya merah jambu. Di sium aku lama-lama. Buka aku balut ampin ba tubuh iya, deka meda jari kaki enggau tubuh iya. Puji ngagai Tuhan anak aku menyana! Nadai penimpang! Disium aku baru kuyu iya, diberap aku lama-lama. Di tenung aku mua iya ti pemadu sigat endar. "Tu meh sulu aku..." ko aku dalam hati enggau penuh penyayau enggau pengaga.
Maianya, pemedis abi jait, ati ti seilu-ilu nadai laki di tisi, nyau enda berasai agi leboh aku udah betemu enggau sulu buah hari aku, 'anak tuai' aku.
...Daddy 'baby' datai tiga hari udah iya ada. Nadai orang madah ngagai iya. Iya empu berasai enda nyamai nya kebuah iya ngambi cuti ngabas aku ngagai Sri Aman...
Tu meh cerita pengada anak aku ti tuai ti diberi nama Benjamin Gedom Sim. (Baby lelaki; Ada kena 13 Januari 1989; Pemerat: 2.875kg)
Kena pagi 13 haribulan January 1989, iya nya hari aku bisi appointment ba klinik Ibu dan Kanak-kanak ba Sri Aman, ba terminal bas Sri Aman ka diatu, dia kliniknya suba. Betunga enggau spital. Kadiri aku ti nganjung diri ngagai klinik maianya. Laki ba kuching laban kerja. Udah bekau ka diperesa lutor, dia aku pan di tan laban kesatu, kaki jari enggau mua aku kembai; kedua, darah aku tinggi. Kati enda tinggi deh, pelaba aku laban aku tekelalu maioh pengirau ti nyarut ka runding aku.
Lemainya, apai enggau indai aku bisi ngabas aku ka sepital pulai kira-kira pukul 8.30 malam. "Pulai kami duai, mang, pelaba ka bedau nuan beranak malam tu, " pia ko apai. Udah seduai iya ka mulai ka diri, dia aku nyepi perut aku bisi muat mimit. Bisi dua minit bakanya iya pedis, udahnya ngetu. Enda lama udahnya muat baru, sekali tu lama agi, bisi lima minit bakanya pedis. Ngetu baru enda lama. "Ka beranak aku tu," ko aku bejako dalam ati. "Lagi meh enti muat baru aku madah ngagai nurse."
Muat sekali da agi, lama endar serta enggau pedis ama. Dia aku lalu madah ngagai nurse. Nurse pan lalu meresa aku. "Au, ka beranak nuan tu, Rose." ko iya. Sida pan nyurung ka aku ari wad ngagai 'Labor Room' bilik endor orang beranak. Jam maianya udah pukul 10 lalu, nyau ka semak pukul 11. Muat balat endar perut aku leboh baru datai ba bilik beranak. Nyau engkutung tubuh nat ka pemedis iya. Lama endar asai pedis asai ka enda nemu badu. Ngetu enda lama. Mata ka tinduk . leboh maia iya muat baru, 'Akai indai, tu meh asai ka beranak' ko aku bejako dalam hati. 'Tulong meh aku Tuhan. Saup meh aku nunga pemedis tu, " ko sampi aku leboh maia perut aku muat balat enda badu. 'Lapan centimeter' ko nurse dinga aku. Dia datai dua iko da agi nurse ngimbai endor aku. 'Sedia nuan, Rose'Enti muat balat teran lagi, ko siko ari ti baru datainya bejako. Aku ngasai ka diri lembut endar tulang. Di tuchuk nurse aku ba pah. Perut aku sigi endang enda ngetu pedis. Lama udah pedis sepi aku. Enda nemu ni ti muat balat ni ti enda balat. Mata aku lembut endar ka tinduk. 'ROSE, TERAN KA ANAK NUAN DIATU!' ko siko nurse merak. Aku semina muka mata enda lama, lalu ka lelap baru. Engka udah kelalu lama pedis, chelap meh bisi dia. 'ROSE! ROSE! DANI NUAN!' ko nurse siko baru. Nyamai endar tinduk enti udah asainya sepi aku. Tang bala nurse nyau rauh-rauh ngasoh aku dati, nempik kuyu aku ngasoh aku beteran. Aku nguji ngumpul semua tenaga ngering diri. Sepi aku kak muat meh perut aku balat endar aku lalu nguji neran. TERAN! ko sida tiga nganu aku. Bedau ga pansut. Muat baru, 'TERAN!' Teran endar ka, Rose' ko siko ka nyambut anak. Dia aku teran penapat iya ulih aku. Dia aku ngasai ka utai petang dipeda aku. 'Manah, Rose! Udah pansut pala baby nuan." ko nurse. "Sekali da agi." Muat baru, dia aku lalu neran pengambis pengering aku. Ngelincir asai utai keluar. Jam maianya 11.58 malam. Sempat mata aku meda jam ba dinding ka endang diengkah nunga endor beranak. "Udah? Ni 'baby' aku? Bakani gamal iya? Indu tauka lelaki?" ko runding aku din. "Lelaki anak nuan, Rose," ko siko nurse ti ngangkat ka babynya bejako madah ngagai aku. Tang aku enda tepansut ka jako ngagai nurse. Peda aku nurse nungging ka baby. Keruk iya mulut, engkah iya tube ba nyawa iya kena nyedut ai kamah ka bisi ba mulut baby, enda lama udahnya baru baru bisi ninga baby nya nyabak kele-kele. "Oooo idup meh anak aku' ko aku bejako dalam hati.
Siko nurse lalu ngintu aku. Ngeluarka temuni. Udahnya nyait abi. Nadai asai pedis sepi aku maianya. Engka bisi diberi sida nurse pemenat. Enda berasai aku dijait iya laban aku nyau rindang berati ka siko nurse ti ngintu baby. Udah siap aku dijait, diberesi serta di gari, aku pan lalu disurung pulai ngagai wad, lalu diasoh tindok ba wad. "Anak nuan engkah kami ba 'nursery' malam tu laban lutor ka 'observe' iya." pia ko siko nurse madah. Pelaba aku anak akunya nyau ka lemas laban aku ka nyau lembut tulang deka tindok maia aku ka patut beteran tadi. Sukur meh aku ulih ngering diri. Enti enda ni enda lemas anak aku," ko runding dalam hati.
Malamnya, nadai meh 'baby' dibai ngagai wad baka orang maioh laban lutor deka meda bakani gaya iya semalam nya. Maianya jam udah lepas 1.30 pagi.
Datai aku ba wad aku pan lalu tinduk. Pukul 7 pagi aku tedani ninga bala nurse baru udah sampal datai. Lapar endar sepi aku. "Ni indai aku bedau datai ngabas aku?' ko aku bejako kadiri. Laki aku enda nemu aku beranak, Agi ba Kuching, kerja. Leboh orang meri makai, makai bebendar aku laban kelalu lapar. Pukul 9 pagi, ibu, bini apai biak menyadi indai aku bisi datai ngabas bala sida ka bisi mega beranak. Dia iya tepeda ka aku. Pulai iya arinya iya lalu madah ngagai sida indai aku udah beranak. Maia nya suba ni bisi utai ti dikumbai 'handphone'. Talipon pan tusah ka ngena. Ka betalipon ngagai HQ endor laki kerja, laki pan benong ba kampong. Nadai orang diasoh madah. Bepesan ba orang, nya meh aja cara maia nya suba. Ba tusah.
"Ni anak aku tu neh? Nama lama endar sida enda nganjung iya ngagai aku?" ko aku bejako dalam hati. Aku nyau irau laban semua orang ka beranak dudi ari aku udah bisi merap baby sida. Pukul 10.30 pagi baru siko nurse nyurung ka 'baby' aku. Gaga endar ati aku. Keterubah aku meda ,megai serta merap iya, enda berasai ai mata aku laboh. Gaga, pemadu iya gaga ati aku. Sigat endar baby aku. Iya ga burak, kuyu iya merah jambu. Di sium aku lama-lama. Buka aku balut ampin ba tubuh iya, deka meda jari kaki enggau tubuh iya. Puji ngagai Tuhan anak aku menyana! Nadai penimpang! Disium aku baru kuyu iya, diberap aku lama-lama. Di tenung aku mua iya ti pemadu sigat endar. "Tu meh sulu aku..." ko aku dalam hati enggau penuh penyayau enggau pengaga.
Maianya, pemedis abi jait, ati ti seilu-ilu nadai laki di tisi, nyau enda berasai agi leboh aku udah betemu enggau sulu buah hari aku, 'anak tuai' aku.
...Daddy 'baby' datai tiga hari udah iya ada. Nadai orang madah ngagai iya. Iya empu berasai enda nyamai nya kebuah iya ngambi cuti ngabas aku ngagai Sri Aman...
Tu meh cerita pengada anak aku ti tuai ti diberi nama Benjamin Gedom Sim. (Baby lelaki; Ada kena 13 Januari 1989; Pemerat: 2.875kg)
Comments
Post a Comment