AKU SEMINA AKU

AKU SEMINA AKU, tu meh naka aku, nadai lebih nadai mega kurang, nadai ulih ditempa-tempa; aku meh semina aku; mua aku, mata aku, idung aku, jari kaki aku enggau semua perengka tubuh aku sigi endang enggi aku aja. Nadai siko mensia di dunya tu bisi sebaka enggau aku. Aku nemu sayau, nemu rindu, nemu gaga, nemu nyabak; Aku nemu ngembuan juluk ati, nemu ensepi nyamai, nemu mega pedis, nemu mati leboh datai hari ila; Bisi maia aku tau ngasoh orang ketawa, bisi maia aku enda; Bisi maia aku kisuk sibuk gawa bisi mega maia aku belelak nadai utai gaga; Aku meh sulu, aku meh pangan, aku meh kaban, aku meh belayan; Aku anak indu, aku indai. Bala anak aku meh keresa aku, iya ka pemadu berega dikembuan aku dalam pengidup tu; Aku bisi siko aja sulu, nya meh tawing idup aku, apai dom aku... Aku nemu bajik, nemu manis, nemu malu; bisi maia aku berani; bisi maia nemu takut. Aku bisi ngembuan pengelandik, pio keno ko orang madah ka aku. Tajapan pia, aku ukai orang ti sempurna; bisi maioh ga penimpang aku, Bisi maia aku ngereja penyalah; Aku nemu ringat pedis ati; Ati aku tau ensiban enti dikeduan; bisi maia aku tusah ngampun ka orang ka salah ngelaban aku, taja pan ti nunda ka aku nemu aku patut. Penemu aku endang sigi enggi aku empu; bisi maia disalah mereti ka orang, bisi maia aku ngereja utai ukai nitih ka peneka ati aku tang kena ngemuas ka ati orang bukai, Aku tau ngembuan maioh mua baka tekang gemala, tang siti endang tentu, AKU SEMINA AKU, nya meh naka aku...